عمر محمد سعد
المساهمات : 5
تاريخ التسجيل : 12/10/2008
 |  موضوع: اغانى مكتوبه  الإثنين أكتوبر 20, 2008 8:05 am | |
| يا ضلنا
يا ضلنا المرسوم على رمل المسافة
وشاكى من طول الطريق
قول للبنيـّة الخايفة من نار الحروف
تحرق بويتات الفريق
قول ليها ما تتخوفى
دى النسمة بتجيب الأمل
والأمل بيصبح رفيق
والأصلو فى الجوف إندفن
لا بتنسى .. لا بنمّحى
لا بنتهى منو الحريق
********
والفينا من آهات أليمة
فى حكاوينا القديمة
لا بيرحل عن عيونـّا
ولا بتغشاهو الهزيمة
والقبيل راجِنو نحن
يوم تبشـِّر بيهو غيمة
لما تمطر يوم علينا
الفرح يملا المدينة
والبلودات الحزينة |
سطوة محاسنك
كان نفسى أقولك من زمان
بى الكاتمو فى سرى .. ومكتـّم فى حشاى
مدسوس سنين
بى الشايلو فى عيني معزّة
وفى القلب
ريداً يخاف الغربة والشوق .. والحنين
زاملنى زى خاطر الفرح
وكتين يقاسم الهم .. عزا
وكتين مدامعى تكون جِـزا
وتفتح مباهج الليل .. ظنون
**************
كان نفسى أقولِّـك من زمان
سطوة محاسنك عندى ما كسرة ..جفون
وكت العيون تعبرنى زى خاطر المسا
سطوة محاسنك ما الرخام .. الفى الحرير
وكت الثغير يفجعنى
بى حرفاً .. قِـسـا
سطوة محاسنك عندى وكتين كبريائك ينهزم ..
لى طيبتى .. بى لفظة حنان
وكتين مشاعرك .. تنسجم فى عمرى
تنفح قلبى بى رعشة أمان
سطوة محاسنك عندى
وكتين شوقى يصبح فى هواك
ليل عزّة
ما بتعرف هوان
***************
كان نفسى أقولك من زمان
عينيك وحاتك غربتى .. وأهلى
وبلادى الفيها ضايع لى زمن
عينيك وحاتك شوقى لى زولاً ولوف
من بعدو ساب عينى .. سهن
وانا كنت داير من زمان
أشرح حكايتى معاك ألف
أحكيك .. وأزيد القول .. إلِفْ
وأتمنى لو قلبك عرف
كان من زمان
من قبل ما فى قلبى يتحكـّر
زمان الغربة فى جرح الأسى
من قبل ما حرف الحقيقة الحلوة
.. يتبدل عسى
ويصبح أمانى كسيرة
.. فى خاطر الحنان |
| |
|
