قصيدة عن الغربة

يا غربة يا بكايه ياغشاشه يامستهبله
تغرينا بي درهم قروش ووراه قنطار بهدله
جيناك نقعد بس سنة وحاجاتنا ناقصه نكمله
نبني البيوت في العاصمه ونفرش أساسها نجمله
وكرولا حاره نرسلها أصله النقل صار مشكله
ونكمل الدين بمهله والسمحه جاهزه نحصله
غير القروش اللى الأهل عبر الشهور حأرسله
والباقي يدخل في البنوك ونشوف دباره نشغله
ناس فكرت تجنى العلم وتبدأ الدراسه تواصله
أحلام كثيره وشيقه وآمال كبيرة مدنكله
لكن حساباتنا الغلط في كل عام بنرحله
مرت سنين من الصبر ...............وبنفضله
والحسبة وصلت طاشرات أمكن نعيش ونبدله
وتعال نحاسبك ياوهم من غير رقم أو أسئلة
كان للقروش نجري ونحوش لكن تقول بنشاكله
ماراضية تقعد في الجيوب وتقول حرامي بينشله
لكن بترقد في الضهور بي ديون ثقيله مطوله
ممحوقة مابتقضي الغرض وأقل حاجه تكمله
كملانة بطحاء وحق وزن ومجاملات مستعجله
وضرائب أبوعاج المشي والزامي حمدي نحوله
وأحلامنا ديك صبحت سراب نمشي ونجري مانحصله
ياريت يكون هم القروش ياغربة فيك المعضلة
لكن تعال شوف الهموم الما أفتكرنا نقابله
ذلة ومهانة وإحتقار خلو النفوس متململه
سجنا كبير فيه الكفيل سجان قيوده مكبله
أشغاله شاقة مؤبدة ودائماَ تكون مستعجلة
مرض الضغط والسكري ومرض القلب ووجع الكلي
مصران وقرحة وإكتئاب ونفوسنا ما متحمله
وبقينا كيمان لحم تحت الهدوم متندله
وأكيد يكون أكل المعلب والمجمد عامله
وعدم الرياضة والكندشة لابد يكون ليهم صله
وكمان تعال للمعادلة الماقدرنا أصلاَ نعدله
سجن العيال جوه الشقق ولافراق العائله
جيب العيال فيه لمخاطر وجيوبنا غيره مميله
وصغارنا صبحت بالزهج متوحشة ومتجفله
لا قادرة تدرس بي نفس من الدروس المذهله
تلقي الولد غالبه الكلام والبت كبيرة مريله
كل الضغوط جاتهم سوا ماقدرنا حتى نقلله
في كل ظرف تلقي القرف تلقى الخيوط متشابكه
أما الفراق أصل الوجع ومشاكله بايته مقيله
والفراق عارفين مشاكله ومافي داعي نفصله
ياغربة أديناك كثير أدينا خاطرك يسهله
خلينا نرجع بالفضل نلحق حياتنا نعدله
آمالنا فيك بدري أتنست إلا الرجول مترحله
وبقينا زي أهل القبور لا البره عارف يدخله
ولا الجوه يرجع لى وراه يحكى الحقيقة يوصله
لكن خلاص هان الخلاص عدك نزل مهما علا
وإنشاء الله نحيا نودعك وتكوني ذكرى نغازله
يا غربه يا بكاية يا غشاشة يا مستهبله

بالجد باجد
قصيده اروع من رائعه يا حسن
ومنتظرين المذيد

مشكور الاخ أمين على مرورك

زول فعال المساهمات : 105 تاريخ التسجيل : 11/12/2007

والله لوكانت من كلماتك فاقول ليك بالجد ابدعت
وكلنا مكتوين من نار الغربة بس الحمد لله نحن هنا مابنعرف حاجة اسمها كفيل
بس بالجد حساب السنين صحيح مليون في المية واي واحد أغترب كان في حساباتو سنه سنتين أوبالكتير 3 بس لما تعدي التلاته سنه بيكون هو مردوم ديون في غربتو وفي سودانه فيضطر يلحقا الرابعة بعد الرابعة لوكفي دينو بيفكر في راس مال لاي مشروع وهلمجرا

القصيدة منقولة من احدى المنتديات ولكنها تمثل حال كل مغترب

المساهمات : 41 تاريخ التسجيل : 23/02/2008 العمر : 45

يديك العافية اخي حسن
قصيدة رائعة جدا
بالجد دا حال الغربة وانا واحد من ضحاياها احمد الله
نصيحتي لكل الشباب يفكرو مليون مرة قبل ما يغتربو
و المغتربين اتمنى ان يحافظو علي نفسهم وعاداتهم وتقاليدهم
و الاهم من كدة انهم هناك يكونو يد واحدة حتى والو يفرقو عن نفسهم شوية من الروتين اليومي الممل جدا
تحياتي

مشكور اخونا حاج علي على مرورك فياريت لو نتعرف عليك اكثر من خلال واحة التعارف

المساهمات : 41 تاريخ التسجيل : 23/02/2008 العمر : 45

تحياتي اخي حسن
بحثت عن واحة التعارف بالمنتدى ولم اجدها وياريت تكون واحة عامرة بالجد وتكون لينا نحن بالذات صلة رحم ومعرفة بكل اهلنا البنعرفهم والما لاقيناهم قبل كدة
ودي مناسبة جميلة, انو يكون في اقتراح بان تتعارف كل العضوية مع بعض عن طريق الواحة
علي الصديق محمد الصديق الخليفة احمد بدر
حاج علي
قطر / الدوحة

» قصيدة السلسلة